香港隱世大學 - 嶺南大學/LingU/LingnanU

好老實講，點解筆者想寫呢個系列嘅原因，主要係因為網絡上有關嶺南大學相關嘅文章太少啦，導致到唔少嘅同學仔喺填報jupas嘅時候，見到jupas網站上有嶺南大學嘅選擇，但係完全唔知定係咩一回事，同時上網查下有冇乜有關嶺南大學嘅資訊。

點都好，戴返個頭盔先，筆者已經有一段時間冇返嶺南啦，文章寫嘅內容未必係最更新嘅。如果有咩錯漏嘅話，亦都希望大家可以多多包涵，筆者會盡全力確保所寫既野都系真確既。文章嘅內容亦都係筆者個人嘅小小嘅見解可能未必適合你，但希望你透過筆者嘅文章可以了解多少少關於嶺南大學，同畀你做少少參考。

嶺南大學位於香港屯門，如果你坐地鐵嘅話，你會喺兆康站落車，之後行一陣就到。又或者你會選擇喺地鐵落車之後，轉乘坐K51到嶺南大學站。不過其實好近，行就可以。

唔少住港島或者住九龍嘅同學仔可能會擔心嶺南大學喺大西北喎，咁遠我返學點算呀？尤其是係住喺港島同學，可能會擔心如果冇宿舍住，咁樣既話我每日咪要來回四個鐘咁樣返學？其實呢樣嘢一啲都唔需要擔心，嶺南大學有十宿，意思姐係指有十棟宿舍。同時，嶺南大學嘅博雅教育其中一個元素就係為學生提供豐盛嘅社堂生活。嶺南大學嘅總學生人數相較其他大學小（好多），基本上所有嘅同學仔都可以四年全宿。完全唔需要擔心住宿嘅問題。

嶺南大學個邊食飯上會唔會冇咩選擇呀？聽講嶺南個canteen....幾好食㗎喎。其實除咗嶺南canteen之外，大家仲有其他好多嘅選擇㗎，包括泰寧堂上面嘅嶺南樓，即係酒家，好好食十分推介。附近有富泰邨商場同街市，有唔少嘅選擇。再唔係大家可以選擇乘坐K51去井財街有唔少好食嘅選擇例如雲川燒，或者再坐遠啲去到屯門市中心都有唔錯嘅選擇，又再再再或者呢啲都唔啱你心水，可以出元朗食大排檔，再再再然後可以去屯門碼頭嗰邊搵你鍾意食嘅嘢，如果你真係好揀飲擇食，嶺南大學出面有個巴士站坐架車出旺角油尖旺地區食飯好方便，再坐返車返返嚟都唔係好耐。

又有啲人擔心嶺南大學咁細，啲設施會唔會唔夠用㗎？其實呢樣嘢真系唔洗擔心。正所謂麻雀雖小五臟俱全，嶺南大學嘅圖書館有三層，聽人講，最近裝修咗，唔知有冇變多層出嚟呢？不過睇返啲相裝修咗既圖書館，真係幾靚。除咗圖書館之外，有健身室、運動場、游泳池、電腦室、溫書房、小組討論空間、琴房（唔知仲有冇）、跳舞室、同其他大大小小嘅房間供大家選用。聽講依家讀藝術嘅同學仔，仲有專門嘅房間，有曬所有嘅程式畀大家用。至於讀數據科學嘅同學仔，有佢哋專門嘅實驗室/房，畀佢哋用。所以並唔需要擔心設施唔夠用嘅問題。

因時間所限，篇嘢就寫到呢度先。筆者會盡快更新其他部分。多謝大家既關注。

編者：勞子

如果你想知道有關嶺南大學既最新最詳細嘅資訊，可能你需要瀏覽嶺南大學既官網，或者致電嶺南大學查詢。本系列僅為分享及一般參考用途，所有大學資訊以嶺南大學官方公佈既為準。